多謝大家關心

我尋晚返左黎香港了, 多謝大家關心我條腰, 問左好幾個人, 果度應該叫做脊錐, 本來去到台灣第三日, 已經好好多, 可惜人在江湖, 身不由己, 推到一個客人話唔食得酸唔食得辣, 都推唔到第二個客, 仲要飲埋酒, 第二朝立即發覺果度好似腫左, 都冇辦法, 唯有頂硬上 ...

我每日都有打電話返屋企, 聽婆婆講, 頭兩日小柔都唔明咩野叫做去左台灣做野, 淨係成日問婆婆, [媽咪今晚又唔返黎食飯呀 ???] 哈哈 ~ 原來小柔只係以為我唔返黎食飯...

過多兩日, 佢好似開始明白我冇返屋企, 响電話中, 會同我講 [媽咪, 我好掛住你呀~~]雖然唔知係唔係幕後有人教佢講, 不過聽到好開心 ...

再過多兩日, 婆婆話佢周圍話比人聽 [媽咪去左台灣買八仙果], 又扮野打電話比契媽, 話比契媽知 [媽咪去左台灣買八仙果], 但係婆婆同佢講, [你打比邊個呀 ? 依家契媽同媽咪一齊喎 ......] 哈哈哈 ...

過馬路要小心

今日與同事午飯後行返公司, 本來想在一架大貨車同一架貨van 中間穿過馬路, 但係我突然見到大貨車開倒車, 於是我同同事講 "嘩 ~ 開倒車呀 ~ 唔好行, 咪一陣比佢撞死~~" 跟住我地就再行後d 先過馬路 ..

點知 ... 果架貨車, 真係睇唔到後面有一架貨van 响度, 撞左埋去 ... 

嘩 ~ 如果當時我地真係照行過去, 咁我地咪 .......................

勸大家一句...如果見到有倒車, 千祈唔好行車尾呀 ~~ 

*****************************************************

前兩日, daddy 抱住小柔過馬路, 不遵守交通規則的daddy, 見到紅燈照樣過馬路, 哈哈 ..點知小柔同daddy 講 : [daddy ~ Red 呀 ~ 唔行得呀 !!]

kaka ...

與櫻花無緣

去了日本多次, 總是沒有機會踫上櫻花, 可能見到時, 未必是我想像中那麼美, 但是, 這是一種情義結, 真的很渴望見到櫻花 ..

本來用asiamiles 訂好了四月往日本看我期待已久的櫻花, 因為daddy 的一個決定而被迫延期了, 又要再慨嘆一次與櫻花無緣 ..

幸好靚契媽現居於日本, 剛於過去的星期日往伊豆拍了一些櫻花相, 以解我單思之苦 ..多謝靚契媽 

長江七號

今日睇左長江七號 ..知道唔係笑片, 有朋友勁話唔掂,  所以我都預左唔好睇..但係冇辦法, 周星星死硬派fans, 幾年一套, 點都要去捧下場 

唔知係唔係因為做左人地亞媽, 所以依家好鬼感性, 一睇到d 講關於子女的戲, 就特別容易喊 ..

劇情我响依度唔想講太多, 因為好多人未睇, 不過, 我個人覺得幾好睇, 有笑位, 不過唔係好似逃學威龍果d 大笑位;  有喊位, 我喊濕左兩張紙巾, 不過我算係易喊果隻..我唔鍾意"功夫"&"少林足球", 因為講太多足球同功夫, 我冇興趣, CJ7 講溫情, 好啱我睇 !

喜愛度 :  (五粒星為滿分)

可憐的街童

前兩日放工的時候, 响屋企樓下, 見到幾個十二, 三歲的街童响街流連, 其中一個女街童突然用流利的口吻講 "教佢講"XXXXXX啦"....佢所指要教的"佢" 係一個只有歲半左右的BB, 相信應該係其中一個街童的細佬 ..天呀 ~ 依個BB 真係好可憐, 成日同埋依班人一齊, 佢的將來, 我地都不難想像 ...

PS : X = 粗口

我們的下一代

最近同daddy 傾開九歲兒童自殺事件, 發覺我地依家真係唔知應該點樣教下一代好 ..

我地細個時, 成日比亞媽鬧, 印象中, 我亞媽從來未稱讚過我, 但係就成日响人地面前鬧我 ..到我出黎做野之後, 就發覺自己好冇自信心, 成日覺得自己差過人, 樣樣野都唔掂.

現代兒童心理學教人要多稱讚小朋友, 令佢地將來可以有自信心, 因為我的童年經歷, 令到我堅信不異, 所以小柔一出世, 我便時常去稱讚佢, 希望佢唔好重蹈我geh 覆轍, 將來做個有自信心geh 人..

小柔依家兩歲幾, 我地開始可以見到佢geh 性格 ..性急, 大脾氣, 有主見, 成日以為自己好叻, 自己啱晒, 唔聽教, 要做主角, 一發覺自己唔係主角, 就會好down, 唔肯玩 ...

Daddy 就話一定要比d 挫敗感佢, 唔可以事事遷就 ..我都知 ..但係因為同埋婆婆住, 根本就冇可能做到比挫敗感小柔, 因為每次daddy 鬧親小柔, 婆婆就會第一個出現 ..

唉 ~ 我真係唔知應該點做 .. 我們的下一代, 打又唔打得, 鬧又唔鬧得, 但係讚得多又驚佢地變到好自大...

我們的下一代, 我地應該點樣教好呢 ? 

浦公英的約定

最近好鍾意聽周杰倫的"浦公英的約定", 尤其是鋼琴部份, 真係好正 !

雖然有人覺得JAY 的歌冇咩變化, 首首歌都差唔多, 但係聽完佢首同以前風格唔同geh "牛仔很忙"之後, 我都係覺得...佢都係唱番好周杰倫geh 歌好d ..我就係鍾意佢d 歌夠周杰倫 ..

多謝網上的這位朋友

一路聽首歌geh琴聲, 我就會imagine有個人彈比我聽 ..哈哈 ..如果係十幾年前, 我諗我腦海會出現一個好有型geh男仔, 例如玉木宏响度彈比我聽 ..不過 ...好笑geh 係 ..我依家腦海出現果個 ...係小柔 ...kaka ....唔知..小柔有冇機會彈首咁好聽geh 歌比我聽呢 ???

扮日本人過新年

大除夕果朝, 睇左日本主婦個blog, 講佢點樣同奶奶一齊整日本年榚, 睇完之後, 我又想親手做, 又想食 ...

下午公司提早放工, 我就一個人去JUSCO行下, 突然發現到現成的日本年榚同紅豆湯, 果一刻, 我真係好開心 ..haha ...心諗 ...今次我地可以扮下日本人過年, 食日本年榚同食紅豆湯勒 ~~ 

尋晚打完邊爐, 返到屋企, 我就準備下厨....

對於普通主婦黎講, 其實真係唔係咩野大件事, 因為只係開左兩包紅豆湯包, 加160cc水, 再加年榚, 煮熱就食得 ..但係對於我依為"無飯主婦"黎講, 真係好難, 唔係講笑架 ..

小柔可能自懂事以來, 都未見過我入厨房咁耐, 平時都只係打開雪櫃, 掉垃圾及倒水 ..應該從來未見過我响厨房度開火 ...所以小柔都用帶點奇怪的眼神, 企响厨房門口望住我 ..

我好緊張地煮左十幾分鐘, 終於有得食勒, daddy, 婆婆, 小柔, 姐姐 ...無一幸免, 全部都要試我geh 手勢...hahaha ..

我食左第一啖 ..oh ....超甜 ...我唔記得試味 ...以為個袋寫160cc, 跟足做就一定得 ...唉 ..咁簡單geh 野 ..又失敗左添 ..

我立即叫婆婆唔好食, 因為佢有糖尿, 叫姐姐唔好食, 因為我知佢唔鍾意食甜野 ..小柔食左兩啖紅豆湯, 仲食緊一啖年榚 ..我問佢好唔好食呀 ? 平時 ..如果好食, 佢會立即話"好食呀", 如果唔好食, 佢會立即"lur" 出黎 ..但係今次, 佢冇答我, 目光唔敢望住我, 好似聽唔到我講咩 ..haha ...跟住我話 ..如果唔好食, 你"lur"番出黎啦, 唔好食勒 ..小柔立即"lur"都"lur"唔切 .....哈哈 ~ 雖然小柔最後都冇食到, 但係我睇得出佢唔想我唔開心, 有嘗試過食落去 ..

最後, 我要多謝daddy, 因為, daddy 係唯一一個全部食晒的, 佢連婆婆果d都食埋 ..多謝daddy !